Lögregluyfirvöld í Houston í Bandaríkjunum hafa sent frá sér meðfylgjandi mynd sem sýnir meintan morðingja sjö ára stúlku. Stúlkan var skotin til bana á sunnudag þegar hún var stödd í bifreið með fjölskyldu sinni.
Bifreið árásarmannsins stöðvaði við hlið bílsins sem fjölskyldan var á og andartaki síðar hóf árásarmaðurinn skothríð. Talið er að hann sé á fertugs- eða fimmtugsaldri og hafa aðstandendur fjölskyldunnar haldið því fram að um kynþáttaglæp hafi verið að ræða.
Stúlkan sem var skotin hét Jazmine Barnes og var hún þeldökk. Árásarmaðurinn var hvítur á hörund, fölleitur og klæddur í svarta hettupeysu þegar árásin var framin.
LaPorsha Washington, móðir stúlkunnar, hvatti árásarmanninn til að gefa sig fram á blaðamannafundi sem haldinn var í vikunni. Svo virðist vera sem um algjörlega handahófskennda og tilefnislausa árás hafi verið að ræða.
Málið hefur vakið mikla athygli í Bandaríkjunum og ekki síst í Houston þar sem árásin var framin. DeAnbdre Hopkins, leikmaður Houston Texans í bandarísku NFL-deildinni, hefur heitið því að láta hluta launa sinna renna til fjölskyldu Jazmine. Alls er um að ræða 29 þúsund dali, 3,5 milljónir króna, sem Hopkins mun fá þegar lið hans etur kappi í úrslitakeppni NFL-deildarinnar um helgina.
