Christian Maire, kvæntur tveggja barna faðir í New York-ríki í Bandaríkjunum, var drepinn í fangelsinu í síðustu viku, Christian þessi var dæmdur í 40 ára fangelsi í desember síðastliðnum en hann var höfuðpaurinn í alræmdum barnaníðshring.
Maire og átta aðrir einstaklingar voru viðriðnir málið. Um var að ræða hóp karlmanna sem sigldi undir fölsku flaggi á netinu. Mennirnir þóttust vera unglingspiltar og fengu þeir barnungar stúlkur meðal annars til að senda nektarmyndir af sér.
Athygli vekur að þegar dæmt var í málinu kom ung stúlka fram sem vitni. Hún ávarpaði Maire beint í dómsal og sagði hann mega búast við því að vera laminn illa í fangelsinu.
Hún reyndist sannspá því barsmíðar drógu Maire til bana. Nokkrir fangar réðust á hann síðastliðinn föstudag í fangelsinu í Milan í Michigan og var hann úrskurðaður látinn á sjúkrahúsi nokkrum klukkustundum síðar. Einn árásarmannanna var vopnaður heimatilbúnum hníf.
Þolendur Maire og hinna sem viðriðnir voru málið voru yfir hundrað og stóðu brotin yfir um fimm ára skeið. Maire hlaut þyngstan dóm, 40 ára fangelsi, en Jonathan Negroni Rodriguez var dæmdur í 35 ára fangelsi. Sá þriðji, Brett Sinta, var dæmdur í 30 ára fangelsi.
