Samkvæmt skýrslu sem fyrirtækið Ernst and Young gerði, hafa breskar fjármálastofnanir flutt yfir 120 þúsund milljarða króna úr bresku fjármálakerfi eftir að Bretar samþykktu í þjóðaratkvæðagreiðslu að ganga úr Evrópusambandinu. Í skýrslunni kemur fram að þessi tala gæti verið umtalsvert hærri.
Í skýrslunni kemur einnig fram að breskar fjármálastofnanir hafi nú þegar flutt úr landi 2000 störf. Áætla skýrsluhöfundar að sú tala fari upp í 7000 fyrir 29. mars næstkomandi. Yfir 55% af öllum bönkum og fjárfestingarbönkum í Bretlandi segjast ætla að draga verulega úr starfsemi sinni í Bretlandi eftir að landið gengur úr Evrópusambandinu.
Umræður um Brexit samninginn eru hafnar í breska þinginu og er líklegast að kosið verði um samninginn í næstu viku.