44 ára karlmaður, Terence Hamblett, hefur verið dæmdur í tólf ára fangelsi í Bretlandi fyrir kynferðisbrot gegn börnum. Terence þessi kom meðal annars upp földum myndavélum á salerni kaffihúss í þeim eina tilgangi að ná myndum af ungum drengjum.
Myndirnar sem sjást hér að ofan, þar sem Terence sést eiga við myndavélina, urðu meðal annars til þess að hann var sakfelldur fyrir brot sín. Átti lögregla ekki erfitt með að færa sönnur á það að hann hafi komið myndavélinni fyrir á umræddum stað.
Terence er fyrrverandi skátaforingi og fundust myndbönd af fjölda drengja á tölvu hans. Þetta voru ekki einu brotin sem hann var sakfelldur fyrir því rannsókn leiddi í ljós að hann hafði einnig reynt að sannfæra föður um að misnota þriggja ára son sinn kynferðislega. Þetta gerði Terence í gegnum spjallsíðu á netinu. Þá sigldi hann undir fölsku flaggi á netinu og freistaði þess að fá unga drengi til að stunda sjálfsfróun í gegnum netforritið Skype. Loks fannst mikið af barnaníðsefni í tölvu hans, eða yfir 900 ljósmyndir eða myndbönd.
Dómari vandaði Terence ekki kveðjurnar í dómsuppkvaðningunni.
„Það sem þú gerðir var ógeðslegt og hver einasta rétt þenkjandi manneskja fengi viðbjóð ef hún sæi efnið sem þú sóttist í,“ sagði dómarinn í málinu og bætti við að refsingin yrði að taka mið af gjörðum hans. Þá þyrfti dómurinn að senda skýr skilaboð til annarra einstaklinga í sömu hugleiðingum og hann.
Var niðurstaðan því tólf ára fangelsi.