Þetta er kannski ekki þekktasta eyja í heimi en hún stendur á stað sem er einn sá þekktasti í heimi. Eyjan sem um ræðir er á Amazon-svæðinu í Brasilíu og er hún nú til sölu fyrir sem nemur 105 milljónir króna.

Amazon Resort-eyja, eins og hún heitir réttu nafni, stendur á Mamori-vatninu í suðurhluta Manaus í Brasilíu. Amazon-svæðið er þekkt fyrir gríðarlega náttúrufegurð en regnskógurinn hefur átt undir högg að sækja á undanförnum árum vegna ágangs skógarhöggsmanna.

Í auglýsingunni sem finna má á netinu kemur fram að hús með sundlaug fylgi eyjunni sem er rúmir tíu hektarar að stærð. Veðursæld á svæðinu er mikil og þá eru ekki miklar líkur á að nágrannar muni trufla þig, enda um afar strjálbýlt svæði að ræða.

Tvö eiginleg íbúðarhús eru á eyjunni; annað samastendur af stórri setustofu, eigendasvítu með einkabaðherbergi og sérstöku herbergi fyrir aðstoðarfólk. Þá er þvottahús í umræddu húsi og eldús að sjálfsögðu. Í hinu húsinu eru fjögur gestaherbergi, öll með sér salernisaðstöðu. Loks er lítill bústaður með tveimur stórum lúxusherbergjum ef von er á enn fleiri gestum.

Segja má að þessi litla eyja sé nokkuð sögufræg því á árunum 1940 til 1975 voru unnin lyktarefni úr rósavið, sem vex á eyjunni, og efnin flutt til Frakklands þar sem þau voru meðal annars notuð í snyrtivörur. Heimsótti þáverandi Frakklandsforseti, Giscard d‘Estaing eyjuna árið 1975. Frá árinu 1985 hefur núverandi eigandi rekið þarna ferðaþjónustu fyrir ríka einstaklinga.

Nú er eyjan og allt sem henni fylgir komin á sölu og má segja að möguleikarnir séu margir fyrir þá sem hugsa sér gott til glóðarinnar.