Hvaða aðferð er árangursríkust til að losna við bjórvömbina? Hlaup eða hjólreiðar? Vísindamenn eru ekki í vafa um hvaða aðferð er árangursríkust eftir að hafa rannsakað málið ofan í kjölinn.

Vísindamenn við Harvard School of Public Health segja að árangursríkasta leiðin til að losna við svokallaða bjórvömb sé að lyfta lóðum og ekki sé verra að blanda þolþjálfun saman við styrktarþjálfunina. Með þessu geti fólk minnkað magafitu og haldið eða jafnvel aukið vöðvamassann.

Metro Express sagði að rannsóknin hefði náð til 10.500 hraustra Bandaríkjamanna yfir fertugu. Í 12 ár fylgdust vísindamennirnir með þeim og hreyfingu þeirra og könnuðu hvaða áhrif hreyfingin hafði á mittismálið.

Þeir sem stunduðu styrktarþjálfun í 20 mínútur á dag fitnuðu minna um mittið en þeir sem stunduðu þolþjálfun eins og hlaup. Best er þó að blanda þessu tvennu saman að sögn vísindamannanna.