Ísraelski flugherinn gerði loftárásir á fjölda skotmarka í Sýrlandi í morgun. Meðal skotmarka voru alþjóðaflugvöllurinn í Damascus ásamt þjálfunarbúðir Írana. Einnig voru gerðar árásir á loftvarnir sýrlenska hersins.

Segja embættismenn í Ísrael að árásin hafi verið svar við eldflaugaárásum Írana á Ísrael. Mikil spenna er á svæðinu og hefur sú spenna enn þá aukist eftir að Donald Trump, forseti Bandaríkjanna, tilkynnti fyrir stuttu að hann myndi kalla aftur heim alla bandaríska hermenn í Sýrlandi. Eru þeir um 2.000 talsins og hafa bandamenn Bandaríkjanna á svæðinu furðað sig á þessari ákvörðun forsetans.

Íran fordæmi árásirnar og sagði Aziz Nasirzadeh, hershöfðingi í íranska flughernum, að flugher hans væri tilbúinn að svara til baka. Bashar al-Assad, forseti Sýrlands, hefur sagt að Íranir séu velkomnir í landinu, en íranskar hersveitir hafa aðstoðað hann að berja niður uppreisn í landinu. Eingöngu tvö svæði í landinu eru ekki undir stjórn Assads, en það eru einmitt svæðin þar sem bandarískir hermenn eru staðsettir í dag.

Mike Pompeo, utanríkisráðherra Bandaríkjanna, sagði í mánuðinum að þrátt fyrir að bandarískir hermenn myndu yfirgefa Sýrland væri það markmið þeirra koma öllum írönskum hersveitum úr Sýrlandi.