Dag einn datt drengjunum í hug að grafa holu í garðinum. Það vakti litla hrifningu foreldranna en þeir gleymdu pirringi sínum fljótt þegar þeir sáu hvað drengirnir höfðu grafið niður á. Þegar skófla þeirra rakst í eitthvað hart var það upphafið að sögu sem átti eftir að vekja mikla athygli um allan heim.
Það sem þeir höfðu grafið niður á reyndist vera Ferrari bíll!
Foreldrar þeirra trúðu að vonum ekki eigin augum en urðu auðvitað að gera það. Þeir hringdu í lögregluna sem mætti á staðinn með vinnuvél og gróf bílinn upp. Inni í bílnum var leður og handklæði. Þegar hann var opnaður gaus hræðileg lykt upp og áhyggjurnar sóttu strax á nærstadda. Var lík í bílnum?
Bíllinn var grafinn alveg upp og rannsakaður hátt og lágt en sem betur fer var ekkert lík í honum. Hér var um Ferrari Dino 246 GTS sportbíl að ræða, árgerð 1974. Hann hafði verið grafinn þar sem áður var sundlaug sem tilheyrði húsinu sem stóð áður á lóðinni. En ekkert var vitað um af hverju bíllinn var þarna eða hver eða hverjir höfðu komið honum fyrir.
Lögreglan fann fljótlega út úr því hver var skráður eigandi bílsins. Samkvæmt skrám lögreglunnar höfðu tveir eldri menn tilkynnt að bílnum hefði verið stolið á meðan þeir sátu að snæðingi á veitingastað í Los Angeles. Lögregluna grunaði að bílþjófurinn/þjófarnir hefðu ætlað að geyma bílinn þarna um hríð og síðan sækja hann en eitthvað hafi komið í veg fyrir það og því hafi bíllinn enn verið þarna 1978 þegar drengirnir grófu niður á hann.
En það dró ekki úr ráðgátunni að mennirnir tveir, sem tilkynntu hvarf bílsins, voru horfnir og var ekkert vitað um hvar þeir væru niðurkomnir. Tryggingafélagið, sem hafði greitt bætur í kjölfar bílþjófnaðarins, neyddist til að selja hann hæstbjóðanda til að fá eitthvað upp í kostnað sinn. Það var Brad Howard sem keypti bílinn á um 8.000 dollara en það er lítilræði miðað við verðmæti bílsins. Hann lét ástand bílsins ekki hræða sig og tókst að koma honum í gott stand með aðstoð bifvélavirkja. Svo ótrúlegt sem það kann að virðast þá var vél bílsins í toppstandi eftir dvölina ofan í jörðinni.
Síðan gerðist ekkert í málinu í nokkur ár. Þá fjallaði bílablað um málið og ræddi við Brad sem sagði hvernig hann hefði komist yfir hann. Þetta vakti athygli Greg Sharp, blaðamanns hjá AutoWeek, og hélt hann áfram að kafa ofan í málið.
Eftir töluverða rannsóknarvinnu komst hann að því að afbrot hafði átt sér stað en í allt öðru formi en lögreglan taldi. Mennirnir tveir, sem áttu bílinn, höfðu orðið gjaldþrota og höfðu ekki efni á að eiga bílinn en þeir voru svo ánægðir með hann að þeir vildu alls ekki láta hann frá sér. Af þeim sökum ákváðu þeir að „leggja“ honum í tómu sundlauginni og hylja með mold. Þetta átti að gera þeim kleift að fá tryggingafé greitt fyrir bílinn en um leið gátu þeir átt hann áfram. Þeir fengu síðan greitt frá tryggingunum en af hverju bíllinn var aldrei sóttur er enn ekki vitað.
