Emmanuel Macron og eiginkona hans, Brigitte, hafa lengi verið tilefni slúðurs og fréttaflutnings. Það hefur lengi farið í taugarnar á mörgum að Brigitte er 24 árum eldri en eiginmaðurinn. En nú berast fréttir af því að helstu ráðgjafar forsetans séu svo þreyttir á Brigitte að þeir vilji hana helst feiga.

Þetta kemur fram í nýrri bók, Madame La Présidente. Telegraph skýrir frá þessu. Í bókinni kemur fram að ráðgjafar forsetans séu þreyttir á völdum Brigitte og því hversu miklum hún ráði þegar kemur að ákvarðanatöku forsetans.

Í bókinni segir að ráðgjafarnir líti á Brigitte sem keppinaut en þeir eru óvanir að konur veiti þeim samkeppni. Á daginn veita þeir forsetanum ráð og fá hann til að taka ákvarðanir byggðar á þeim en á kvöldin segist hún vera ósammála og hann skiptir um skoðun.

Emmanuel og Brigitte kynntust þegar hann var 15 ára og hún 39. Hún var frönskukennari hans í menntaskóla. Þau hafa verið par síðan hann var 17 ára og hún 41. Eins og fyrr segir hefur samband þeirra oft verið gagnrýnt vegna aldursmunarins og hefur hún verið kölluð öfuguggi og barnaníðingur. En nú eru það áhrif hennar á frönsk stjórnmál sem hún er gagnrýnd fyrir. Í bókinni kemur einnig fram að hún ráði töluverðu um hverjir fái og hafa fengið ráðherrastöður í ríkisstjórn Emmanuel. Ónafngreindur heimildamaður gengur svo langt að segja að Brigitte sé „hægra hvel heila forsetans“.