Bandaríski öldungadeildarþingmaðurinn Bernie Sanders segir að rekja megi ótrúlegar hækkanir á lyfjaverði til ótrúlegrar græðgi. Eitt tiltekið lyf, Firdapse, sem gagnast þeim sem þjást af Lambert-Eaton-taugasjúkdómnum kostar til dæmis 45 milljónir króna á ári nú eftir að hafa fengist allt að því án endurgjalds.

Sanders, sem hefur verið orðaður við forsetaframboð, skrifaði bréf til forsvarsmanna lyfjafyrirtækisins Catalyst sem framleiðir lyfið. Einn af hverjum hundrað þúsund Bandaríkjamönnum þjáist af umræddum sjúkdómi og segir Sanders að margir þeirra muni þjást eða deyja vegna þessara ótrúlegu hækkana.

Forsvarsmenn fyrirtækisins hafa varið þessar hækkanir og bent á að margir sjúklingar muni áfram geta nálgast lyfið á ódýran máta. Sanders hefur óskað eftir frekari útskýringum á þessu, en, umfram allt, vill hann vita hvernig fyrirtækið réttlætir það að rukka 45 milljónir króna fyrir lyfið sem fékkst án endurgjalds fyrir nokkru síðan.

Sjúklingar gátu nálgast lyfið ókeypis frá Jacobus Pharmaceuticals, litlu fyrirtæki í New Jersey, fyrir tilstilli Matvæla- og lyfjaeftirlits Bandaríkjanna. Í nóvember síðastliðnum fékk Catalyst leyfi frá stofnuninni til að framleiða lyfið og fékk auk þess einkaleyfi á því. Í kjölfarið hækkaði verð á lyfinu margfalt.