Óhugnanleg sjón blasti við viðbragðsaðilum sem kallaðir voru að húsi einu í Costa del Sol á Spáni. Þar fannst lík 71 árs eftirlaunaþega og leikur grunur á að konan hafi verið látin í eitt ár áður en hún fannst.

Konan sem um ræðir, Valerie Butroid, fannst eftir að nágrannar kvörtuðu undan slæmri lykt sem lagði frá íbúðinni sem er skammt frá Marbella. Hún hafði dvalið á Costa del Sol ásamt dóttur sinni og hefur lögreglan hafið rannsókn á því hvernig dauða konunnar bar að og hvers vegna enginn lét vita af dauða hennar.

Engir áverkar voru á líkinu og benda fyrstu niðurstöður til þess að konan hafi dáið af eðlilegum orsökum í mars á síðasta ári. Nágranni sem Mail Online ræddi við segir að lyktin hafi verið allt að því óbærileg í hitanum í sumar.

„Hin látna var með minnisglöp en dóttir hennar sagði að hún hefði látist í kjölfar falls í sumar. Ég gerði ráð fyrir að hún hafi dáið á sjúkrahúsi. Það er óhugnanlegt að hugsa til þess að hún hafi verið látin í íbúðinni allan þennan tíma,“ segir nágranninn sem vildi ekki láta nafn síns getið.