Illa gengur að koma fimm vatnslitamyndum sem sagðar eru vera eftir Adolf Hitler í verð. Myndirnar sem um ræðir voru til sölu á uppboði í Nurnberg í Þýskalandi um helgina en seldust ekki.
Áður en Adolf Hitler varð kanslari Þýskalands og leiðtogi Nasistaflokksins reyndi hann fyrir sér sem listmálari – án mikils árangurs.
Ástæða þess að myndirnar voru lítt eftirsóttar á uppboðinu um helgina er sú að ekki þykir útilokað að myndirnar séu falsaðar. Höfðu uppboðshaldarar vonast til þess að fá sem nemur 2,5 til 6 milljónum króna fyrir hvert verk.
Myndirnar eru merktar Adolf Hitler og eru málaðar í svipuðum stíl og aðrar myndir hans. Þremur dögum fyrir uppboðið á laugardag lagði lögregla hald á 63 málverk sem sögð voru eftir Hitler vegna gruns um að þau væru fölsuð. Talið er að eftir Hitler liggi um tvö þúsund myndir sem hann málaði í Vínarborg sem ungur maður. Hann reyndi að komast inn í listaháskólann í Vín en var hafnað.