Tuttugu og eins árs karlmaður fannst látinn í yfirgefinni byggingu í Detroit í Bandaríkjunum aðfaranótt sunnudags.
Maðurinn var ásamt hópi vina í byggingunni þar sem farið var í feluleik. Í leit að góðum felustað ráfaði maðurinn inn í lyftugöng þar sem hann féll niður nokkrar hæðir. Fallið var mjög hátt en maðurinn var á 9. hæð byggingarinnar og er hann talinn hafa látist samstundis.
Eðli málsins samkvæmt áttu vinir hans erfitt með að finna hann og yfirgáfu þeir bygginguna þegar þeir fundu hann ekki. Töldu þeir jafnvel að hann hefði farið heim til sín. Morguninn eftir sneri hópurinn til baka og þá fannst maðurinn látinn.
Margar tómar byggingar eru í Detroit og er ástand margra þeirra hættulegt. Umrædd bygging var eitt sinn vöruhús fyrir matvælafyrirtæki en hefur ekki verið í notkun síðan árið 2002 og því í talsverðri niðurníðslu.