Þrjú börn, 1, 4 og 6 ára, fundust látin á heimili einu í Live Oak í Flórída á sunnudag. Svo virðist vera sem börnin hafi gert sér að leik að fara ofan í frystikistu á heimilinu sem þó var ekki í sambandi.

Eitthvað varð til þess að börnin komust ekki upp úr kistunni. Endurlífgunartilraunir báru ekki árangur. Börnin bjuggu í húsinu með mæðrum sínum sem eru herbergisfélagar. Tvö barnanna voru systkini.

Önnur móðirin var að gæta barnanna þegar hún brá sér á salernið. Þegar hún kom til baka fann hún ekki börnin í húsinu. Þau fundust hins vegar ofan í umræddri frystikistu en ekki fyrr en of seint. Lögreglu grunar ekki að neitt saknæmt hafi átt sér stað.