Sjónvarpsveitan Netflix þarf að grafa örlítið dýpra í vasa áskrifenda sinna á sama tíma og fyrirtækið dælir nýju efni út. Nú hafa forsvarsmenn Netflix ákveðið að hækka verð til áskrifenda sinna.
Áskriftir fyrir Bandaríkjamarkað hækkuðu í gær en grunnáskrift á mánuði kostar nú 9 Bandaríkjadali samanborið við 8 dali áður. Aðrar dýrari og vinsæli áskrifaleiðir hækka einnig; sú sem kostaði 11 dali kostar nú 13 dali og svokölluð úrvalsáskrift kostar nú 16 dali á mánuði en kostaði 14 dali.
Netflix hefur hægt og bítandi hækkað verð á undanförnum misserum en þessi hækkun er sú mesta síðan efnisveitan tók til starfa. Breytingin tekur gildi strax fyrir nýja áskrifendur en þeir sem þegar eru með áskrift munu þurfa að borga meira innan þriggja mánaða.
Talsmaður Netflix segir við bandaríska fjölmiðla að hækkunin sé til komin vegna fjárfestinga Netflix í nýju og kostnaðarsömu sjónvarpsefni. Áætlanir gera ráð fyrir að Netflix muni verja um 12 milljörðum dala í kaup á efni og framleiðslu á nýju efni á þessu ári. Það er um tvöfalt hærri upphæð en árið 2016.