Nokkrum dögum eftir að hann fór á deildina var Kyle settur inn á lokaða deild. Yfirvöld tóku fram fyrir hendurnar á honum og foreldrum hans og lögðu hann inn á geðdeild. Hann hafði ekkert um það að segja. Nú, þrettán árum síðar, er Kyle lokaður inni á réttargeðdeild í Skotlandi þar sem meðal annars má finna morðingja og nauðgara. Sjálfur hefur Kyle aldrei komist í kast við lögin.
Málið hefur vakið talsverða athygli í Bretlandi og skyldi engan undra.
Fjölskylda hans steig fram í viðtali við Mail Online um helgina og lýsir móðir Kyle því hvernig hann hefur verið laminn, honum strítt, hann sendur í einangrun og sterkum lyfjum dælt ofan í hann. Þá þurfti að sauma 45 spor í hann og koma plötum fyrir í handlegginn á honum eftir að hann handleggsbrotnaði illa í átökum við starfsfólk.
„Ég kenni sjálfri mér um. Ég hélt að ég væri að hjálpa honum með því að senda hann á þessa deild – ég hlustaði á sérfræðinga – en í raun og veru var ég að setja snöruna um hálsinn á honum. Ég þarf að lifa með þeirri ákvörðun það sem eftir er,“ segir Tracey, móðir hans.
Í umfjöllun Mail Online kemur fram að Kyle sé einn níu einstaklinga sem greinst hafa með einhverfu sem lokaður eru inni á umræddu sjúkrahúsi, Carstairs. Rannsókn blaðsins leiddi í ljós að dæmin séu fleiri, mörg hundruð einstaklingar í svipuðum sporum séu lokaðir inni á deildum víðsvegar um Bretland.
Afhjúpunin hefur vakið athygli ráðamanna í Bretlandi sem hafa kallað eftir rannsókn. „Þetta er harmleikur. Kyle er lokaður inni með mörgum af harðsvíruðustu glæpamönnum Bretlands. Það þarf augljóslega að endurmeta hans stöðu og hann þarf að fá að fara heim. Þetta á ekki að fá að viðgangast,“ segir Alexander Burnett, þingmaður Íhaldsflokksins, um málið.
