Það var núverandi eigandi landsins sem vakti athygli bæjaryfirvalda á steinhringnum sem er í Leochel-Cushnie. Steinhringurinn vakti strax athygli fornleifafræðinga og Historic Environment Scotland og fornleifaþjónusta Aberdeenskíris fögnuðu þessum merka fornleifafundi og hófu rannsóknir á staðnum. Hringurinn þótti sérstaklega merkilegur vegna þess hversu lítið þvermál hans var og steinarnir í honum þóttu í minna lagi.
Nýlega gaf fyrrum eigandi umrædds lands sig fram og sagðist hafa útbúið steinhringinn á tíunda áratug síðustu aldar og hafi hann verið eftirlíking af svipuðum steinhring.
Breskir fjölmiðlar hafa eftir Neil Ackerman, sem vinnur við skráningu fornleifa hjá Aberdeenskíri, að það hafi augljóslega verið mikil vonbrigði að heyra þetta en þetta bæti þó áhugaverðum þætti við söguna. Það að steinhringurinn hafi verið svona vel gerður sýni að staðbundin þekking sé til staðar á fornminjum á svæðinu.
„Ég vona að fólk haldi áfram að nota steinhringinn. Hann er ekki ævaforn en hann er á frábærum stað og fellur frábærlega inn í landslagið.“
Steinhringir sem þessir eru oft 3.500 til 4.500 ára gamlir og finnast aðeins í norðausturhluta Skotlands.
