Þó að Adam Crapser hafi fæðst í Suður-Kóreu þekkir hann engan í landinu og kann ekki einu sinni tungumálið. Þrátt fyrir það var Adam sendur til Suður-Kóreu eftir að hafa verið vísað úr landi í Bandaríkjunum, 37 árum eftir að hann var ættleiddur þangað.
Málið hefur vakið talsverða athygli undanfarin misseri en hann var þriggja ára þegar hann var ættleiddur til Bandaríkjanna frá Suður-Kóreu. Óhætt er að segja að líf hans í Bandaríkjunum hafi ekki verið neinn dans á rósum. Hann var beittur ofbeldi og voru fósturforeldrar hans handteknir vegna þeirra ásakana árið 1991.
Þegar Adam komst á fullorðinsár áttaði hann sig á því að hann væri ekki með græna kortið, sem er forsenda þess að geta lifað og starfað í Bandaríkjunum. Þegar hann kannaði málið betur kom í ljós að hann hafði aldrei fengið græna kortið, var í raun ekki ríkisborgari í skilningi laganna og því ólöglega í landinu. Fjölskyldur hans í Bandaríkjunum höfðu trassað það að sækja um nauðsynleg gögn. Hafa ber í huga að Adam hafði nær alla sína ævi búið í Bandaríkjunum, gengið í skóla þar og eignast fjölskyldu.
Í ljósi þess að Adam hafði áður gerst brotlegur við lög gátu bandarísk yfirvöld vísað honum úr landi með vísan í lagaákvæði. Fyrir margt löngu hlaut hann dóm fyrir innbrot og líkamsárás og árið 2016 var honum loks vísað úr landi og hann sendur til fæðingarlandsins, Suður-Kóreu.
Undanfarin ár hefur Adam verið í Suður-Kóreu þar sem hann er einangraður að mörgu leyti. Sem fyrr segir talar hann ekki tungumálið, þekkir ekki mikið til suðurkóreskrar menningar. Lesendur gætu í raun sett sig í hans spor og spurt hvernig þeim myndi reiða af ef þeir yrðu skyndilega sendir til Suður-Kóreu.
„Þetta er barningur frá degi til dags,“ segir Adam, sem nú er 43 ára, í samtali við AP-fréttastofuna. Adam hefur í raun ekki marga möguleika, afar ólíklegt er að hann geti snúið aftur til Bandaríkjanna og hefur Adam ákveðið að leita réttar síns fyrir suðurkóreskum dómstólum. Hefur hann stefnt yfirvöldum í Suður-Kóreu og ættleiðingarstofunni, Holt Chrildren’s Services, sem sá um mál hans á sínum tíma.
Adam krefst þess að fá 177 þúsund Bandaríkjadali í bætur, rúmar 20 milljónir króna, en í kröfugerðinni sem Adam leggur fram kemur fram að víða hafi pottur verið brotinn hvað varðar ættleiðingar frá Suður-Kóreu á sínum tíma. Í raun hafi ættleiðingar – og allt sem þeim fylgdi – orðið að stórum bissness, ef svo má segja, á áttunda og níunda áratugnum. Þá voru mörg börn send frá fjölskyldum sínum í fljótfærni; lítið hafi verið hugsað um þeirra hag, hvert þau yrðu send og hvort nauðsynlegir pappírar fylgdu. Yfirvöld hafi einblínt á „útflutning á börnum“ í þeim tilgangi að auka hagvöxt í landinu.
Þá bendir Adam á að lítið sem ekkert eftirlit hafi verið með fyrirtækjum sem sáu um ættleiðingar. Í frétt AP er þess getið að Adam sé líklega langt því frá sá eini í þessum sporum. Þúsundir barna voru ættleidd frá Suður-Kóreu til Bandaríkjanna á sínum tíma og þykir ekki ólíklegt að margir einstaklingar í Bandaríkjunum séu ekki með græna kortið. Yfirvöld í Suður-Kóreu segja að Adam sé einn fimm einstaklinga sem sendir hafa verið til baka til Suður-Kóreu frá Bandaríkjunum.
