E24.no segir að miðað við tölur frá Alþjóðagjaldeyrissjóðnum og Eurasia Group sé hrun efnahags landsins meira en nokkru sinni hefur gerst í hinum stóru efnahagskreppum heimsins.
Frá 2015 hefur þjóðarframleiðsla í landinu dregist saman um 60 prósent. Til samanburðar þá dróst þjóðarframleiðslan saman um 18 prósent í Weimarlýðveldinu á fjórða áratugnum og um 24 prósent í Grikklandi þegar fjármálakreppan skall á 2008. Þegar kreppan mikla skall á Bandaríkjunum frá 1929 til 1933 dróst þjóðarframleiðslan saman um 29 prósent.
Efnahagshrunið í Venesúela á aðallega rætur að rekja til þeirrar staðreyndar að 96 prósent af útflutningstekjum landsins eru af olíu. Á velmegunarárunum, þegar olíuverð var hátt, var sú leið farin að flytja vörur inn í stað þess að framleiða þær. En um leið og olíuverð lækkaði dró úr getu landsins til að greiða fyrir erlendar vörur. Ríkissjóður er galtómur og fáir eða engir vilja lána landinu peninga. Á sama tíma hefur olíuframleiðslan dregist saman vegna skorts á nýjustu tækni og fjárfestingum.
Ofan á þetta bætist himinhá verðbólga sem veldur því að almenningur á ekki til hnífs eða skeiðar. Í stuttu máli sagt þá eru peningaseðlar landsins ekki meira virði en pappírinn sem þeir eru prentaðir á.
