Það er ekki alltaf tekið út með sældinni að vinna milljónir í lottóinu þó marga eflaust dreymi um það. Michael Carroll vann 10 milljónir punda, einn og hálfan milljarð á núverandi gengi, árið 2002 í breska lottóinu.

Hafi Carroll haldið að hann þyrfti ekki að hafa áhyggjur af fjármálum sínum það sem eftir væri skjátlaðist honum hrapallega. Carroll eyddi peningunum í tóma vitleysu og það tók hann ekki mörg ár að eyða öllu vinningsfénu í tóma vitleysu; fíkniefni og vændiskonur þar á meðal auk skartgripa og lúxusbíla. Tíu árum eftir að hafa unnið þann stóra var Carroll búinn að eyða öllu.

Sjálfur segist hann ekki hafa séð eftir peningunum – eða öllu djamminu eftir að hafa orðið milljónamæringur.

Í nýrri umfjöllun sem birtist á vef breska blaðsins Mirror segist Carroll nú vera kominn í vinnu sem skógarhöggsmaður. Hann fær sem nemur 1.500 krónum á tímann fyrir vinnuna sem er nokkuð líkamlega krefjandi.

„Peningurinn var fljótur að hverfa en ég get ekki kvartað yfir neinu,“ segir hann. Auk þess að höggva tré þarf hann að flytja þunga poka, stútfulla af kolum, á milli staða. „Þetta eru 50 kílóa pokar og þarf að lyfta svona 150 pokum á dag,“ segir Carroll sem mætir til vinnu klukkan sex alla virka morgna.

Sem fyrr segir sér Carroll, sem er ekki nema 35 ára, eftir neinu. „Lífið snýst ekki um peninga. Það kann að hljóma brjálæðislega en ég hef aldrei verið hamingjusamari. Að verða gjaldþrota er það besta sem gat komið fyrir mig – þetta var samt mjög gaman meðan það entist.“