Samkvæmt nýrri rannsókn gætu Grænlendingar orðið einn stærsti útflytjandi sands í heiminum ef Grænlandsjökull heldur áfram að bráðna. Það velkist enginn í vafa um það að íshellan á Grænlandsjökli hefur minnkað töluvert á undanförnum árum vegna hlýnunar jarðar.

Undir jöklinum leynist mikill sandur og möl en sandiðnaðurinn veltir ótrúlegum fjármunum á ári hverju. Mikill sandur berst fram að ströndum landsins, samhliða bráðnun íshellunnar, en að mati vísindamanna er útflutningsverðmæti hans hátt í hundrað milljarðar króna á ári. Þetta mun aðeins aukast samhliða bráðnun Grænlandsjökuls.

Reuters fjallaði um þetta og vísaði í niðurstöður norskra og bandarískra vísindamanna sem birtu niðurstöður sínar í tímaritinu Nature Sustainability.

Í frétt Reuters kemur fram að sandiðnaðurinn í heiminum hafi velt 99,5 milljörðum Bandaríkjadala, tólf þúsund milljörðum króna, árið 2017. Skortur er á sandi í heiminum og því mun verð á honum líklega aðeins hækka á næstu árum og áratugum. Gera áætlanir ráð fyrir að þessi iðnaður muni velta 480 milljörðum Bandaríkjdala árið 2100.

Sandur er til margra hluta nytsamlegur, til dæmis til að búa til steypu og þá er gler búið til úr bráðnum sandi.