Amy þessi er sögð hafa haldið framhjá eiginmanni sínum með fanga í fangelsinu. Hún hafi verið orðin yfir sig ástfangin af honum og að lokum brugðið á það ráð að koma eiginmanni sínum, Joshua Murray, fyrir kattarnef.
Lík Joshua fannst á heimili þeirra hjóna eftir að eldur kviknaði í húsinu þann 11. desember síðastliðinn. Rannsókn lögreglu leiddi í ljós að Joshua var þegar látinn þegar eldurinn kviknaði og leiddi krufning í ljós að hann hafði innbyrt frostlög sem líklega varð honum að bana.
Lögregla segir að Amy hafi skipulagt morðið, allt í þeim tilgangi að geta gengið í hjónaband með umræddum fanga, Eugene Claypool sem afplánar lífstíðardóm í fangelsinu. Eugene var dæmdur fyrir að drepa 72 ára lottóvinningshafa árið 2001.
Á upptökum á símtölum milli Amy og Eugene heyrist Amy tjá sig um hjónabandið; að hún vilji skilja við eiginmann sinn. Í öðru símtali sagði Amy að leiðin fyrir þau væru greið til að ganga í hjónaband þar sem „eiginmaðurinn væri nú látinn og úr sögunni“.