Alþjóðaheilbrigðismálastofnunin hvetur fólk til að vera á varðbergi vegna falsaðs krabbameinslyfs sem er í umferð í Evrópu og Ameríku. Um er að ræða parasetamól sem búið er að pakka í umbúðir af Iclusig, lyfi sem notað er við hvítblæði.
„Þetta er hættulegt og við höfum áhyggjur af þessu,“ segir Michael Deats í samtali við breska blaðið The Guardian. Michael fer fyrir deild innan Alþjóðaheilbrigðismálastofnunarinnar sem skoðar fölsuð lyf.
Michael segir að það sé algengt að sjá til dæmis fölsuð sýklalyf í umferð en öllu óalgengara sé að sjá fölsuð krabbameinslyf á markaði – þó það sé ekki óþekkt.
Lyfið vakti grunsemdir heildsala í Sviss og létu svissnesk heilbrigðisyfirvöld Alþjóðaheilbrigðismálastofnunina vita. Prófun leiddi í ljós að lyfið var falsað og innihélt aðeins parasetamól.
Michael segir að glæpamenn sem standa fyrir þessu reyni að koma lyfjunum í verð á netinu og einblíni á markaði þar sem lyfið er illfáanlegt eða ekki niðurgreitt af heilbrigðisyfirvöldum. „Þeir sem sækja í þessi lyf vilja fá lækningu en í staðinn fá þeir bara verkjalyf.“
Michael segir að sú staðreynd að lyfið sé í umferð veki ákveðnar áhyggjur. Hann bendir á að líkurnar á því að lyfið komist í umferð á stærri mörkuðum, til dæmis í Bretlandi, séu litlar. Þó sé nauðsynlegt að vera á varðbergi því dæmi séu um að lyfsalar í Bretlandi kaupi lyf af mörkuðum þar sem lyfin eru ódýr. „Við vitum ekki hversu mikið þetta er og þess vegna þurfa allir að vera vakandi.“