Ekki er hægt að segja að árið 2018 hafi verið sérstaklega gæfuríkt fyrir fluggeirann því flugslysum og dauðaslysum fjölgaði nokkuð frá árinu 2017.
Samkvæmt tölum sem Alþjóðasamband flugfélaga (IATA) birti á dögunum urðu 62 flugslys á síðasta ári. Um er að ræða atvinnugreinasamtök um 230 flugfélaga um allan heim. Til samanburðar urðu 46 flugslys árið 2017. Þegar litið var til slysa þar sem dauðsföll urðu fjölgaði þeim úr sex árið 2017 í ellefu árið 2018.
Samtals létust 523 einstaklingar í þessum flugslysum árið 2018, 19 fleiri en árið 2017. Alvarlegasta flugslysið varð í lok október í fyrra þegar 189 manns létust þegar Boeing 737-þota Lion Air brotlenti skömmu eftir flugtak í Jakarta í Indónesíu.
Þó að slysum hafi fjölgað á liðnu ári eru flugferðir áfram einn allra öruggasti ferðamátinn. Að meðaltali gæti hver farþegi í farþegaflugi vænst þess að fljúga samfellt í 241 ár áður en flugslys verður.
Alexandre de Juniac, stjórnarformaður IATA, segir að árið 2017 hafi verið sérstakt hvað flugöryggi varðar. Þess vegna líti tölurnar fyrir árið 2018 verr út. „Á síðasta ári ferðuðust 4,3 milljarðar farþega með öruggum hætti í 46,1 milljón flugferða. Síðasta ár var ekki jafn gott og árið 2017. En flug er öruggur samgöngumáti og gögnin segja okkur að flugferðir verða öruggari með árunum.“