Marc Crapo er einn sá allra litríkasti í stangveiðiheiminum og þeir sem fylgjast með erlendum veiðimiðlum kannast eflaust við hann. Crapo var hér á landi ásamt Ken Tanaka (Wish4Fish) og Meredith McCord sem er ein þekktasta stangveiðikona í heimi.

Þríeykið var að veiði í Þingvallavatni og í Köldukvísl á vegum Fish Partner. Crapo var ekki lengi að landa sínum fyrsta ísaldarurriða í Villingavatnsárósi og steig hann trylltan stríðsdans í kjölfarið. Skömmu síðar setti McCord enn eitt heimsmet sitt þegar hún landaði 11 punda urriða á 6 punda taum.

Eins og alltaf þegar Tanaka er á svæðinu er myndavélin á lofti og aldrei að vita nema við sjáum afraksturinn í vetur.