,,Veiðin fer vel af stað í Laxá í Kjós og núna eru komnir 25 laxar á land sem verður teljast gott,“ sagði Haraldur Eiríksson er við spurðum stöðuna í Kjósinni en langt er síðan fyrsti laxinn sást í ánni.
Veiðimenn tóku sér smá hvíld frá veiðiskapnum meðan á leik Íslendinga og Argentínumanna stóð yfir. Af honum loknum tóku menn upp þráðinn á nýjan leik og gekk vel eins og áður sagði.
,,Opnunarhollið var við veiðar í tvo og hálfan dag og gekk vel. Laxinn er rólega að dreifa sér um alla á en Bugða er ekki dottin inn ennþá. Þetta kemur allt í rólegheitunum,“ sagði Haraldur við Laxá í Kjós.
Mynd. Óðinn Elísson með lax á í Laxfossi. Mynd Robert Selfors.