,,Við erum búnir að vera á veiðislóð í Stóru Laxá í Hreppum um helgina og ég fékk einn vænan í Bergsnösinni meðal annars,“ sagði Gunnar Örlygsson skömmu eftir að hann landaði laxinum sem var 98 cm.
,,Laxinn var á í um það bil 40 mínútur en það er gott að þreyta fisk í Bergsnösinni, þetta var verulega skemmtilegt. Vorum fyrst á svæði eitt og tvö og færðum okkur svo á svæði fjögur. Veiðifélaginn minn, Davíð Ibsen, fékk líka stórfisk í Myrkhyl sem reyndist vera 96 cm. Við fengum 10 laxa á þessum tveimur svæðum og misstum nokkra,“ sagði Gunnar ennfremur.
Stóra Laxá er komin með 420 laxa núna og ennþá eru eftir nokkrir dagar eftir í henni og aldrei að vita hvað gerist ef rignir verulega.
Mynd. Gunnar Örlygsson með laxinn úr Bergnös, 98 cm fisk. Mynd Davíð.