Það eru margir víða um land sem stunda dorgveiði sér til skemmtunar á hverju ári. Ísinn hefur kannski ekki verið uppá marga fiska í vetur og það hefur haft sitt að segja fyrir veiðimenn. Og reyndar hættulegur á köflum.
,,Við fórum uppá heiði um daginn og þar var ísinn í lagi en ekki niður í byggð, fengum nokkra fiska,“ sagði veiðimaður fyrir norðan, sem oft fer á dorg á hverjum vetri.
Hérna fyrir sunnan hefur ísinn á vötnunum ekki verið góður en er kannski aðeins að lagast þessa dagana. Aðeins hefur kólnað en hvort það er nóg þarf maður að vera með á hreinu. Ísinn þarf allavega að vera 40 til 50 cm til að hann sé öruggur. En fátt er skemmtilegra en að dorga þegar veðurfarið er gott og fiskurinn í tökustuði. Það styttir biðina eftir næsta veiðisumri.
Fyrir norðan er dorgveiði stunduð töluvert og á Mývatni svo einhverjir staðir séu nefndir til sögunnar.
Á myndinni er Guðmundur Bjarkason, leiðsögumaður, með flotta bleikju úr Mývatni. Mynd Helgi Héðinsson.