Flestir veiðimenn þekkja stórlaxahvíslarann Nils Folmer Jorgensen en það eru fáir sem veiða jafn marga stórlaxa ári hverju og hann. Nils hefur veitt 29 laxa á Íslandi yfir 100 cm og heilan helling af löxum á bilinu 90-99 cm.
Íslenska fluguveiðiakademían stendur fyrir fyrirlestrinum undir yfirskriftinni „Að setja í þann stóra“ þann 27. mars næstkomandi í félagsheimili Stangaveiðifélagi Hafnarfjarðar,þar sem Nils mun kynna gestum fyrir sínum veiðiaðferðum og þeirri tækni sem getur fært þig nær draumafiskinum.
Hvar liggur fiskurinn?
Hvernig á að nálgast hann?
Hvaða útbúnað er best að nota?
Hvernig á að velja flugu?
Hvað fær þann stóra til að taka?
Nils mun einnig fara yfir hvað er ekki mikilvægt og hvað er mjög mikilvægt þegar kemur að veiði. Ef veiðimenn styggja fiskinn í fyrsta kasti þá skipta flottustu græjurnar og rétta flugan litlu máli. Að setja í þann stóra getur verið heppni en með hæfilegri bjartsýni, réttri aðferð og góðri frammistöðu ertu mun nær drauma fiskinum.
Einstakur fyrirlestur sem enginn veiðimaður ætti að láta fram hjá sér fara.