Á tíunda tímanum í gærkvöldi var akstur ökumanns stöðvaður í austurhluta Reykjavíkur. Ökumaðurinn er grunaður um akstur undir áhrifum fíkniefna og að hafa ekið sviptur ökuréttindum. Við leit á honum fundust meint fíkniefni og í bíl hans fundust ólöglegir hnífar og járnkylfa. Allt var þetta haldlagt.

Í gærkvöldi var tilkynnt um innbrot í bifreið í austurborginni. Í ljós kom að búið var að brjóta rúður í þremur bifreiðum en ekki er vitað hvort einhverju var stolið úr þeim.

Síðdegis í gær var ölvaður maður handtekinn í miðborginni en hann hafði verið á áreita, ógna og veitast að fólki.

Um klukkan hálf níu í gærkvöldi var tilkynnt um grunsamlegar mannaferðir í húsagötu í Grafarvogi. Lögreglumenn stöðvuðu viðkomandi í akstri skömmu síðar. Hann er talinn hafa verið undir áhrifum fíkniefna auk þess sem hann er sviptur ökuréttindum. Hann var handtekinn og fluttur á lögreglustöð.

Þrír ökumenn voru handteknir í gærkvöldi í nótt grunaðir um að vera undir áhrifum fíkniefna. Einn þeirra er einnig grunaður um að hafa verið undir áhrifum áfengis. Einn þeirra reyndist vera sviptur ökuréttindum og einn þeirra var staðinn að akstri gegn rauðu ljósi.