Tvær stúlkur, 10 og 11 ára, hafa verið kærðar fyrir samsæri um að fremja morð. Lögðu þær á ráðin um að myrða bekkjarsystur sína. Sem vænta má þykir málið afar óvenjulegt en þetta átti sér stað í Prince William sýslu í Virginíu, Bandaríkjunum. Stúlkurnar eru sagðar hafa sent hvor annarri smáskilaboð á eins konar dulmáli og sagt hvor annarri að eyða skilaboðunum.
Að sögn lögreglu komst foreldri eins af börnunum í bekknum að þessu og hafði samband við lögreglu. Það var þó ekki foreldri annarrar hvorrar stúlknanna né foreldri stúlkunnar sem þær hugðust myrða.
Fjallað er um málið á Huffington Post. Þar segir að lögreglan hafi ekki birt textaskilaboðin fjölmiðlum en miðillinn hefur engu að síður heimildir fyrir því að stúlkurnar hafi útlistað í smáatriðum hvernig þær ætluðu að myrða bekkjarsystur sína. Hana sakaði hins vegar ekki því lögreglan komst á snoðir um áform stúlknanna í tæka tíða.
Í Virginíu-fylki er hægt að sækja svona ung börn til saka og bíða stúlkurnar núna réttarhalda.
