Bandaríska geimferðastofnunin NASA hefur misst allt samband við Marsbílinn Opportunity sem hefur verið á Mars síðan 2004. Gríðarlegur sandstormur geisar nú á Mars eða sá stærsti í 15 ár. Hann þekur fjórðung plánetunnar og í miðju stormsins er lítill bíll frá NASA. Sambandið rofnaði um síðustu helgi og hefur ekki náðst aftur.

Opportunity setti neyðarkerfi í gang og slökkti á sér þar sem hann fær ekki næga sólarbirtu til að geta knúið öll kerfi bílsins. Ef allt fer eftir áætlun þá á Opportunity nú að hafa kveikt á klukku sem vekur hann reglulega til að kanna hvort veðrið sé orðið skárra. Vonir standa auðvitað til að hann vakni en starfsmenn NASA óttast þó að hann muni ekki vakna.

Opportunity lenti á Mars í janúar 2004. Reiknað var með að hann yrði nothæfur í 90 daga en það hefur heldur betur teygst á líftíma hans sem er nú orðin rúm 14 ár. Starfsgeta hans er þó aðeins minni en áður, hann getur til dæmis aðeins bakkað núna og málmþreyta er kominn í arminn sem sér um að setja mælitæki niður.

NASA er einnig með annan bíl á Mars, Curiosity, en hann er hinum meginn á plánetunni og því utan við áhrifasvæði stormsins. Hann er heldur ekki háður sólarljósi því hann er kjarnorkuknúinn.