Mjög heitt hefur verið í Danmörku, Svíþjóð og Noregi undanfarnar vikur. Sólin hefur skinið glatt og hitinn verið mikill, að minnsta kosti víðast hvar. Í þeim miklu hitum sem eru þessa dagana er að sjálfsögðu mikilvægt að drekka nóg en þvert á það sem margir telja þá ráðleggur danskur yfirlæknir fólki að drekka ekki bara kranavatn.

Í gær fjölluðu danskir fjölmiðlar um fjölda innlagna á dönsk sjúkrahús undanfarið þar sem eldra fólk hefur verið lagt inn vegna ofþornunar. TV2 ræddi við Michael Hansen-Nord, yfirlækni bráðamóttöku háskólasjúkrahússins í Óðinsvéum, vegna þessa.

„Það á ekki að vera kranavatn, frekar safi, djús, gosdrykkir eða kolsýrt vatn. Kranavatn er ekki svo gott því það er ekkert salt í venjulegu kranavatni og því minnkar saltmagnið í líkamanum og maður getur dáið af þeim völdum.“

Hann sagði að fólk eigi að drekka tvo til tvo og hálfan lítra á dag þegar hitinn er eins og hann hefur verið undanfarið. Hann sagði að einnig eigi að hafa í huga að ekki eigi að drekka áfengi til að fylla upp í þessa vökvaþörf en kaffi og te er hinsvegar ekki galið að drekka sagði hann.