„Okkur brá og við hlógum.“ Sagði Angelica Henriksson, 21 árs, í samtali við TV2 um „póstinn“ sem hún og unnusti hennar, Christoffer Bergström 22 ára, fengu nýlega í póstkassann sinn. Þegar þau kíktu í póstkassann blasti myndarleg hrúga af smokkum við þeim.

Parið, sem býr í Östergötland í Svíþjóð hafði fengið 422 smokka, í óopnuðum umbúðum, í póstkassann sinn. Samkvæmt umfjöllun Nyheter24 þá héldu þau í upphafi að um hrekk væri að ræða.

Þau hringdu í vini sína til að finna „sökudólginn“ en án árangurs, allir voru jafn hissa og þau á þessari undarlegu sendingu. Eftir að Nyheter24 fjallaði um málið var haft samband við parið frá Kondomvaruhuset sem sagði smokkana vera frá fyrirtækinu. Pakkinn hljóti að hafa skemmst og smokkarnir verið settir í rangan póstkassa því þau hafi ekki átt að fá þá.

Angelica birti mynd af smokkahrúgunni í póstkassanum á Facebook og skrifaði með: „Hér koma ekki börn á næstunni.“