Fyrr í vikunni handtók lögreglan tvo karlmenn og þrjár konur á landareign í Nýju-Mexíkó. Þar voru 11 börn á aldrinum 1 til 15 ára og voru þau illa á sig kominn af næringarskorti. Einnig voru þau illa til fara. Barnslík fannst á landareigninni. Karlmennirnir eru grunaðir um að hafa þjálfað börnin til að gera skotárásir í skólum.

Samkvæmt dómsskjölum, sem hafa verið lögð fram, þá þjálfaði annar mannanna, Siraj Ibn Wahhaj, börnin til að gera skotárásir í skólum. Hann og hinir fullorðnu eiga yfir höfði sér ákæru fyrir illa meðferð á börnum en ekki er útilokað að ákært verði fyrir fleiri atriði en þessi.

Lögreglan fann fjölda árásarriffla á landareigninni og þar er skotæfingasvæði. Börnin, sem voru klædd tötrum, höfðu ekkert annað til matar en nokkra kassa af hrísgrjónum og kartöflum.

Konurnar þrjár eru taldar vera mæður barnanna.

Ekki hafa verið borin kennsl á líkið sem fannst en talið er hugsanlegt að það sé af Abdul-Ghani Wahhaj, fjögurra ára, sem hvarf í Jonesboro í Georgíu í desember á síðasta ári. Móðir hans tilkynnti hvarf hans eftir að Ibn Wahhaj hafði sagt henni að hann ætlaði að fremja særingar á drengnum og fór í framhaldi með hann í almenningsgarð. Eftir það spurðist ekkert til þeirra.