Þýska ríkisstjórnin tilkynnti í dag að hún væri í viðræðum við bandamenn sína um mögulega hernaðaríhlutun í Sýrlandi. Þessi yfirlýsing hefur skapað mikla umræðu í Þýskalandi þar sem hernaðaríhlutanir eru ekki vinsælar í landinu vegna sögu landsins. Einnig munu hernaðaraðgerðirnar mögulega hafa áhrif á stjórnmálasamband Rússlands og Þýskalands þar sem Rússar styðja Bashar al-Assad einræðisherra í Sýrlandi.
Steffen Seibert, talsmaður þýsku ríkisstjórnarinnar sagði í yfirlýsingu í dag að Þjóðverjar væru í viðræðum við bandamenn sína í Evrópu og Bandaríkjamenn um mögulega hernaðaríhlutun í Sýrlandi ákveði sýrlenski stjórnarherinn að nota efnavopn gegn uppreisnarmönnum í Idlib héraði. Ekki er um endanlega ákvörðun að ræða þar sem kjósa þarf um tillöguna í þýska þinginu.
Rússneski flugherinn hafa undanfarna daga stundað loftárásir á svæðinu ásamt því að sýrlenski stjórnarherinn hefur skotið úr fallbyssum á svæðið. Um 30.000 íbúar héraðsins hafa nú þegar flúið átökin en Sameinuðu þjóðirnar búast við allt að 1,5 milljón flóttamanna frá svæðinu ef að verður að árás rússneska hersins og sýrlenska stjórnarhersins á héraðið.
Yfirmaður franska heraflans hefur einnig tilkynnt að komi til þess að noti Bashar al-Assads efnavopn munu Frakkar grípa til hernaðaraðgerða gegn stjórnarher hans. Tyrkir hafa kvatt stríðandi fylkingar til að semja um vopnahlé til að forðast dauðsföll á saklausum borgurum. Talið er að um 30.000 vopnaðir uppreisnarmenn séu í Idlib.