Margar gassprengingar urðu í nótt, að íslenskum tíma, í þremur úthverfum Boston í Massachusetts í Bandaríkjunum. Sprengingarnar urðu í Lawrence, North Andover og Andover. Miklir eldar gusu upp í húsum og eru mörg ónýt en önnur sluppu betur. Talið er að gas hafi lekið úr leiðslum og valdið sprengingunum.

50 slökkviliðsbílar og mörg hundruð slökkviliðsmenn voru sendir á vettvang. Lögreglan bað fólk, sem er með gasleiðslur tengdar við hús sín, að yfirgefa svæðið. Tilkynnt hefur verið um eld, sprengingar eða gaslyk í 70 skipti á skömmum tíma.

10 hafa verið fluttir á sjúkrahús vegna áverka sem þeir hlutu í eldi og sprengingum, einn slökkviliðsmaður er þar á meðal. Einn er í lífshættu. 18 ára piltur lést þegar rör lenti á bíl, sem hann var í, þegar hús sprakk í Lawrence.

Eldur kom upp í að minnsta kosti 40 húsum. Um 146.000 manns búa í Andover, North Andover og Lawrence.

„Það er svo mikill eldur og reykur að við sjáum ekki til himins.“

Sagði Joseph Solomon, lögreglustjóri, í nótt.

Ríkislögreglan í Massachusetts bað íbúa á svæðinu að hafa sig á brott. Lokað var fyrir rafmagn og gas á svæðinu.

Yfirvöld telja að of mikill þrýstingur hafi verið á gasi í leiðslum á svæðinu og því hafi leiðslur sprungið.