Karlmaður á þrítugsaldri braust inn í íbúð látins nágranna og stal debetkorti sem hann notaði meðal annars til að fjármagna pítsuát. Hinn 24 ára gamli Robert Sharkey braust inn í íbúð Marie Colon í Belfast á Norður-Írlandi í ágúst 2015, hún var látin og hann lét ekki neinn vita. Þess í stað stal hann debetkortinu hennar og notaði það til að borga símreikninginn sinn og matarinnkaup. Mestu eyddi hann á pítsastaðnum Dominos, eyddi hann rúmlega 6 þúsund pundum, eða 880 þúsund krónum, á tveggja ára tímabili. Breska dagblaðið Metro greinir frá þessu óvenjulega máli.
Colon fannst látin á heimili sínu í október 2017, hún hafði ekki sést lifandi frá því í janúar 2015.
Sharkey var handtekinn eftir að kortanotkun hennar var skoðuð, hann var færður fyrir dómara á þriðjudag þar sem hann játaði allar sakir. Var hann einnig ákærður fyrir að hafa stolið verkfærum, rafhlöðum og kaffibolla af heimili Colon. Honum var sleppt gegn tryggingu, refsing verður ákvörðuð í október.