Í umfjöllun Sky um málið er meðal annars haft eftir Ann Pettifor, sem spáði fyrir um hrunið 2008 tveimur árum áður, að hún telji að efnahagslíf heimsins sé enn einu sinni í hættu vegna mikilla skulda fyrirtækja og aukinnar líkna á hækkun stýrivaxta í Bandaríkjunum. Í samtali við Sky News sagði hún að skuldir á heimsvísu séu nú þrefalt meiri en verg þjóðarframleiðsla.
„Þetta verður auðvitað ekki greitt og auðvitað kemur sá tímapunktur að þessar skuldir ýta næstu kreppu af stað. Að mínu mati eru það hærri vextir sem munu ýta henni af stað. Við sjáum að fyrirtæki sem fengu of mikið lánað á lágum vöxtum sjá nú verðmæti veða sinna falla. Skuldir þeirra fara hækkandi og vextirnir á þær eru einnig að hækka.“
En ekki nóg með það því hún telur að þessi hreyfing sé hafin. Hún segir að sú ákvörðun bandaríska seðlabankans að vinda ofan af stuðningi við efnahagslífið og hætta magnbundinni íhlutun sé nú þegar búinn að leggja grunninn að næstu kreppu.
„Ég held að þessi kreppa verði verri en sú síðasta því við höfum engin verkfæri til að takast á við hana. Það verður mjög erfitt að byrja að dæla út magnbundinni íhlutun, kaupa allar þessir eignir aftur.“
Sagði hún og bætti við:
„Upphaf nýrrar kreppu er hafið.“
Tom Russo, fyrrum forstjóri hjá Lehman Brothers, tók í sama streng í samtali við Sky News og sagði að „líklega væri verið að vökva fræ næstu kreppu núna“.
