Ætla má að Aleksander Petrov og félagi hans Ruslan Bosjirov, sem eru taldir hafa séð um framkvæmd morðtilraunarinnar við Skripal, eigi nú bjarta framtíð í Rússlandi. Að minnsta kosti ef miða má við hvernig Andrej Lugovoj hefur vegnað.
Lugovoj er talinn hafa eitrað fyrir Alexander Litvinenko í Lundúnum 2006. Lugovoj er fyrrum liðsmaður KGB. Hann slapp frá Bretlandi og er nú þingmaður í Rússlandi og rekur fyrirtæki sem blómstrar. Auk þess hefur hann verið heiðraður sérstaklega af Pútín fyrir þjónustu við ættjörðina. Lugovoj vísar því harðlega á bug að hann hafi átt hlut að máli þegar Litvinenko var myrtur. En það er með mál hans eins og mál Bosjirov og Petrov að meira að segja í Rússlandi eiga margir erfitt með að trúa skýringum þeirra.
Eins og DV skýrði frá á föstudaginn þá voru tvímenningarnir í viðtali hjá rússnesku sjónvarpsstöðinni RT í síðustu viku. Þeir lofuðu aðalritstjóra stöðvarinnar, Margarita Simonyan, meðal annars að senda henni ljósmyndir sem þeir tóku að sögn í ferðinni til Salisbury. Þær hafa ekki enn borist. Á hinn bóginn hafa Bretar birt myndir af tvímenningunum þar sem þeir voru á leið að heimili Skripal.
Nýjar upplýsingar gera einnig lítið úr frásögn mannanna um að þeir séu óbreyttir borgarar sem selji prótínduft til líkamsræktarstöðva. Rannsóknarfjölmiðilinn The Insider, sem er rússneskur, hefur birt upplýsingar um að í vegabréfi Petrov séu leynilegar upplýsingar sem styðja kenningar um að hann sé starfsmaður GRU. Dagblaðið Novaya Gazeta hefur einnig sagt að símanúmer, sem er skráð í vegabréf Petrov, sé hjá GRU.
En rússnesk stjórnvöld virðast ekki vera hætt að láta eitra fyrir fólki sem er talið óæskilegt af einhverjum sökum. Nú síðast var það Pyotr Verzilov, einn liðsmanna Pussy Riot, sem varð fyrir barðinu á eitri. Eftir að hafa fengið meðhöndlun á sjúkrahúsi í Moskvu var hann fluttur á sjúkrahús í Berlín til meðferðar. Hann er nú á batavegi.
Svo má nefna að eins og DV skýrði frá í gær þá var tveimur rússneskum leyniþjónustumönnum vísað frá Hollandi í vor eftir að þeir reyndu að hakka sig inn í tölvukerfi svissnesku rannsóknarstofunnar Spiez sem vann að rannsókn á eiturárásinni í Salisbury og efnavopnanotkun í Sýrlandi.