Skömmu áður en árið 2015 gekk í garð setti Englendingurinn Jason Alexander sér göfugt markmið. Hann ætlaði að taka myndir af sólarupprásum árið 2015 og fanga náttúrufegurðina á filmu.

Þegar Jason var byrjaður á þessu verkefni fór hann að huga að öðru leiðindamáli, ef svo má segja. Ruslinu sem var allt í kringum hann úti. Jason er búsettur í Suffolk á suðausturhluta Englands og á almenningsstöðum í kringum hann var allt í drasli; sígarettustubbar, drykkjarílát og pappír.

Jason tók sig til og tíndi það rusl sem hann sá, setti í poka og kom því fyrir á réttum stað. Eitt af því sem vakti mesta athygli Jasons var allt það magn sígarettustubba sem mátti sjá allt í kringum hann. Hefur Jason að undanförnu einbeitt sér að því að tína upp alla þá sígarettustubba sem hann sér og markmiðið er stórt þó það sé í eðli sínu einfalt: Hann ætlar ekki að hætta fyrr en hann hefur týnt upp milljón stubba!

Áætlað er að 4,5 trilljónum stubba sé hent í ruslið – eða út á götu – á ári hverju í heiminum. Stubbarnir eru ekki beint umhverfisvænir og það tekur þá býsna langan tíma að brotna niður í náttúrunni.

Fyrsta kvöldið sem Jason fór út til þess eins að tína upp sígarettustubba fann hann hvorki fleiri né færri en 1.789 stykki. Þetta var á nokkuð stóru bílastæði í Suffolk. Hann hefur haldið uppteknum hætti og fer út nokkrum sinnum í viku. Eitt kvöldið, með aðstoð sjálfboðaliða, tíndi hann upp 3.804 stubba í Ipswich. Og það var svo bara núna um helgina að hann tíndi upp 7.287 stubba á vinsælum hjólreiðastíg skammt frá sjúkrahúsinu í Ipswich.

Í byrjun septembermánaðar var Jason búinn að tína 19 þúsund stubba. Hann á því ærið verkefni fyrir höndum en ætlar ekki að gefast upp. Hann vill að fólk átti sig á því að göturnar eru ekki rétti staðurinn fyrir sígarettustubba. „Við sem samfélag erum orðin blind fyrir öllu því rusli og pasti sem við framleiðum. Ég hef rætt við marga, bæði reykingafólk og þá sem ekki reykja, sem hafa ekki hugmynd um að það sé plast í sígarettustubbum. Og margir líta ekki einu sinni á stubbana sem rusl.“