Árið 2013 var kona ein í borginni Atlanta í Bandaríkjunum stödd á neðanjarðarlestarstöð eins og svo oft áður. Sex árum áður hafði þessi sama kona orðið fyrir hrottafenginni nauðgun. Nauðgarinn komst undan og svo virtist sem hann myndi aldrei þurfa að gjalda fyrir árásina.

Þennan örlagaríka dag á lestarstöðinni taldi konan sig sjá kunnuglegan mann; manninn sem réðist á hana sex árum áður. Hún var viss í sinni sök og hrópaði svo allir heyrðu að þessi maður hefði nauðgað henni og komist upp með það.

Svo fór að lögreglan mætti á svæðið og handtók manninn, sem reyndist vera hinn 54 ára gamli Antonio White. Á dögunum var White svo dæmdur í lífstíðarfangelsi án möguleika á reynslulausn fyrir nauðgunina árið 2007.

Konan sem um ræðir hafði sagt vinum og vandamönnum frá árásinni auk þess sem hún tilkynnti hana til lögreglu á sínum tíma. Rannsóknin skilaði því miður engu og virtist allt benda til þess að árásarmaðurinn myndi ganga laus það sem eftir væri.

Konan hafði þegið far frá White sem bauðst til að skutla henni heim. Í stað þess að keyra hana heim ók hann henni á afvikinn stað, ógnaði henni með skotvopni áður en hann braut á henni kynferðislega.

Sem fyrr segir var White handtekinn og loks dæmdur í lífstíðarfangelsi. Hann hefur áður verið dæmdur fyrir nauðgun og telja saksóknarar að hann hafi mun fleiri slík brot á samviskunni.