Á bílauppboði í Delaware í Bandaríkjunum var Mercedes Benz bíll nýlega seldur á sem svarar til um 730.000 íslenskra króna. En númeraplöturnar á bílnum voru miklu eftirsóttari ef miða má við söluverðið á þeim. Þær voru seldar fyrir 420.000 dollara en það svarar til um 44 milljóna íslenskra króna.

Wall Street Journal skýrir frá þessu. Það sem gerir þessar númeraplötur svo eftirsóknarverðar er að þær bera númerið 20 eða DEL 20. William Lord, sem keypti plöturnar, sagðist vera mjög ánægður með kaupin í samtali við blaðið. Hann sagðist hafa hrifist með af stemmningunni á uppboðinu.

Þetta er þó ekki dýrasta skráningarnúmerið sem hefur verið selt í Bandaríkjunum því 2008 greiddi fasteignasalinn Anthony Fusco 675.000 dollara fyrir DEL 6. Fjölskylda hans á auk þess DEL 8 og DEL 9.

Númeraplötuæði sem þetta er einnig að finna í öðrum ríkjum Bandaríkjanna en ná þó varla sama stigi og í Delaware sem var meðal ríkjanna sem mynduðu Bandaríkin í upphafi en ríkið var það fyrsta til að samþykkja stjórnarskrá Bandaríkjanna þann 7. desember 1787.