Þeir sem voru handteknir í morgun eru taldir tengjast þessu máli að sögn Danska ríkisútvarpsins. Málið er rannsakað á grunni hryðjuverkaákvæða hegningarlaganna. Mennirnir verða færðir fyrir dómara í fyrramálið þar sem gæsluvarðhalds verður krafist yfir þeim.
Íslamska ríkið hefur notað dróna sem vopn og til njósna í átökunum í Sýrlandi og Írak frá 2016. Lögreglan telur að drónana hafi átt að nota til árása á andstæðinga hryðjuverkasamtakanna.
Danska ríkisútvarpið segist hafa heimildir fyrir að þeir sem voru handteknir í dag séu báðir 29 ára og komi úr röðum öfgasinnaðra íslamista í Danmörku.
Annar þeirra sem hefur verið grunaður frá upphafi hefur nú setið í gæsluvarðhaldi í eitt ár en hann er einnig 29 ára. 32 ára maður, sem er dansk-tyrkneskur, gengur laus en hann var búsettur í Tyrklandi og hefur farið huldu höfði eftir að málið kom upp. Hann hefur tengsl við alþjóðleg hryðjuverkasamtök og hefur hlotið dóm fyrir aðild að hryðjuverki.