Lögreglan í Mexíkóborg hefur handtekið par sem grunað er um morð á allt að tíu konum. Að því er fram kemur í frétt breska blaðsins Guardian er parið einnig grunað um að hafa selt barn konu sem þau myrtu.
Málið hefur vakið talsverðan óhug í Mexíkó. Lögregla hafði haft parið grunað um morðin en á fimmtudag lét lögreglan til skarar skríða og framkvæmdi handtökur og húsleit. Í barnavagni fundust líkamsleifar sem grunur leikur á að parið hafi ætlað að losa sig við. Á lóð við heimili parsins, sem er í úthverfi borgarinnar, fundust fleiri líkamsleifar.
Í frétt Guardian kemur fram að parið hafi viðurkennt morð á 10 konum. Þá viðurkenndu þau að hafa selt tveggja mánaða barn konu sem þau myrtu.
