Hinn tveggja ára gamli Leo Belnap veit fátt skemmtilegra en að setja fjölpóstinn sem berst inn á heimilið í pappírstætarann. Hann aðstoðar móður sína samviskusamlega en á dögunum vissi Leo ekki betur og gerði sig sekan um slæm mistök.
Á dögunum setti Leo umslag í tætarann sem innihélt nokkra græna miða með andlitum af forsetum á. Já, hér var að sjálfsögðu um að ræða peninga og dágóða summu, eða rúmar hundrað þúsund krónur.
Talið er að Leo litli hafi sett umslagið í tætarann fyrir síðustu helgi því foreldrar hans, Ben og Jackie Belnap, leituðu að því alla síðustu helgi. Þeim var eðlilega mikið brugðið þegar þau gáðu ofan í pappírstætarann og sáu seðlaræmurnar.
Ekki er útilokað fjölskyldan muni fá peninginn aftur. „Ég hringdi í ríkisstofnun sem sér um skemmda og ónýta seðla og þeir sögðust mögulega geta hjálpað okkur. Við vorum beðin um að senda seðlana til Washington í Ziploc-pokum og ef allt fer að óskum, eftir eitt til tvö ár, munum við fá þá til baka.“