Í kjölfar slæms flogaveikiskast var Linda, 21 árs, lögð inn á Karolinska sjúkrahúsið í Svíþjóð. Hún deildi herbergi með miðaldra karlmanni sem gat ekki „stýrt kynferðislegum hvötum sínum“ vegna aðgerðar sem hann hafði farið í. Um kvöldið vaknaði Linda við að maðurinn hafði sett getnaðarliminn upp að andliti hennar og reyndi að fá hana til að veita honum munngælur.
Þetta gerðist í lok september en þá fékk Linda, sem þjáist af mikilli flogaveiki, alvarlegt kast og þurfti að leggjast inn á gjörgæsludeild Karolinska í Solna. Þegar hún var síðan flutt á taugadeildina var hún sett í herbergi með manninum.
„Hann bað í sífellu um að dyrnar væru lokaðar. Ég var mjög þreytt og vildi bara sofa og hafði ekki orku til að segja neitt. Um kvöldið vaknaði ég við að maðurinn stóð við rúmið mitt og var með kynfæri sín upp við andlit mitt.“
Hefur Aftonbladet eftir henni. Hún sagðist hafa verið mjög veikburða og ringluð. Hún reyndi að ýta manninum á brott en hann ýtti hönd hennar í burtu. Að lokum tókst henni að ýta á bjölluhnappinn til að kalla á starfsfólk. Hjúkrunarfræðingur kom inn og hjálpaði henni að komast á brott.
Linda vildi hafa samband við lögregluna en starfsfólkið taldi best að bíða morguns. Hjúkrunarfræðingur sagði Lindu ástæðuna fyrir dvöl mannsins á sjúkrahúsinu og sagðist telja líklegt að hann hafi talið hana vera eiginkonu sína.
„Þetta fannst mér alveg fáránlegt, þetta bætti stöðu mína ekki neitt.“
Hún gat ekki sofnað og hringdi um síðir í föður sinn og sagði honum hvað hafði gerst. Hann kom á sjúkrahúsið og hringdi í lögregluna sem kom strax á vettvang. Linda var yfirheyrð en ekki reyndist unnt að yfirheyra manninn vegna ástands hans.
Linda segir að lögreglan hafi sagt henni að maðurinn hafi farið í aðgerð á heila og hafi ekki getað haft stjórn á kynferðislegum hvötum sínum eftir það. Þetta hafi starfsfólkið vitað en samt hafi hún verið sett í herbergi með manninum og dyrunum lokað.
Lögreglan rannsakar nú málið og fjölskylda Lindu hefur tilkynnt málið til þeirrar stofnunar sem hefur eftirlit með heilbrigðiskerfinu.
