Þjófar hafa stolið 123 ungum risaskjaldbökum frá uppeldisstöð á Galapagoseyjum að sögn umhverfisráðuneytis Ekvador. Rannsókn stendur nú yfir á málinu og segja yfirvöld að uppeldisstöðin hafi ekki verið með nægilega gott eftirlitskerfi.

Ekkert myndbandsupptökukerfi er í uppeldisstöðinni sem er á miðhluta Isla Isabela. Washington Paredes, talsmaður stjórnvalda, segir að gæslan hafi verið mjög léleg í uppeldisstöðinni. Þjófar hafi getað athafnað sig frjálst og tekið skjaldbökurnar. Þær eru af tegundunum Chelonoidis vicina og Chelonoidis guntheri.

Skjaldbökurnar eru mikið aðdráttarafl fyrir ferðamenn og þungar refsingar liggja við brotum sem ógna náttúru þessara einstöku eyja. Ef þjófarnir nást eiga þeir allt að 10 ára fangelsi yfir höfði sér.

12 skjaldbökutegundir búa á Galapagoseyjum. Þrettánda tegundin, Chelonoidis abingdonii dó út 2012. Galapagoseyjar eru á heimsminjaskrá Unesco.