Líffæragjöf er erfitt ferli og að taka ákvörðun um slíkt reynir oft sérstaklega mikið á ættingja þess látna en einnig getur ákvörðunin reynst erfið fyrir þann sem velur að gefa líffæri sín. Á St. Luke‘s Meridian Medical Center í Idaho í Bandaríkjunum hefur starfsfólkið fyrir vana að sýna líffæragjöfum og ættingjum þeirra einstaka virðingu þegar stóra stundin er að renna upp.

Starfsfólk sjúkrahússins stillir sér upp á göngum sjúkrahússins og myndar heiðursvörð þegar líffæragjafanum er ekið eftir göngunum á leið til líffæragjafarinnar, hin hinsta ferð viðkomandi. Með þessu vill starfsfólkið sýna líffæragjafanum og ættingjum hans virðingu og þakklæti fyrir að að gefa líffæri sín.

Í myndbandinu hér fyrir neðan sést þegar starfsfólkið vottar líffæragjafa virðingu sína á meðan honum er ekið hinstu leiðina inn á skurðstofu þar sem líffæri hans verða fjarlægð. Þögnin er algjör og varla er hægt að hugsa sér meiri virðingarvott en þennan. Myndbandið hefur vakið mikla athygli undanfarna daga og vekur fólk vonandi til vitundar um mikilvægi líffæragjafa.