Árið 2004 var sonur yfirmanns hjá sænska sveitarfélaginu Falu ráðinn til starfa hjá sveitarfélaginu. Það var faðirinn sem réð soninn til starfa. En starfið var greinilega ekki erfiðara en svo að nú leikur grunur á að sonurinn hafi ekki mætt einn einasta dag til vinnu en hafi samt sem áður fengið greidd laun allan þennan tíma.

SVT Nyheter Dalarna skýrði nýlega frá þessu. Fram kemur að sveitarfélagið hafi nú lagt fram kæru hjá lögreglunni vegna málsins. Ekki hefur verið skýrt frá hversu há laun sonurinn fékk en á 14 árum má ætla að upphæðin sé töluvert há.

Talsmenn sveitarfélagsins hafa ekki viljað tjá sig um málið og segja það vegna rannsóknarhagsmuna.

Yfirmanninum og syni hans var sagt upp störfum hjá sveitarfélaginu í september.